SAMPI GELIGA Penutup (24 May 2024- AD Joseph Dusit)

 SAMPI GELIGA Penutup (24 May 2024- AD Joseph Dusit) 

Dalam nama Allah Apai enggau Anak enggau Roh Kudus. Amin

 

Uji ngetu dulu kita bejako diau jenoh anang ragak,

Gulu indu kaban besai,

Tatam Iban ke begepan, bebaju burong lekat gagong bulu ruai,

Nuntong di perabong Gerija besai,

Nyerumba ari gemeri manah amai,

Sebedau tembai kitai pulai ka pejurai rumah panjai.

 

Kebuah bakanya,

Laban aku deka besampi-

Sampi pulai, baka ka muru muai,

Deka ngenataika pinta selada kitai,

Ngagai Jesus anak Maria dara pandai,

Ngena cara jaku tuai,

Kedua nama dikumbai sambiang.

 

Nama tai ke beraoh inggar bemunyi,

Munyi pangka bena gumbang tsunami,

Mangka ka tisi tasik Sumatra,

Nama utai beraoh inggar manjong,

Munyi pangka bena gumbang besabong,

Mangka ka tanjong pulau Jawa.

 

Nama utai ke braoh inggar rengangai,

Munyi serintak sabak anak andai,

Pia ko bala Padri ke udah lesi dulu nadai,

Ti ngenyinu ke leku tangkai kamai,

Ngasoh ati ti berai gila selemai laboh salimas ai mata.

 

O Enti munyi nya,

Uji pending ka enggau manah jako bala katikis serta lay readers,

Uji tentuka jako Andrew menyadi Peter.

 

Nya ka terinting puting dabong Seleka,

Enggi aku; Fr. Makos Mark Luna,

Mai orang besambiang ngadap Petara,

Ka mlm tu iya enda bakanya,

Pengawa kami mlm tu dikena ngelai Pengawa beserara, 

Taja enda jauh ari Sibu pindah ke Kuching,

tang agi betemu begulai ba dunia. 

Tebang bediri menteli laki,

Tu aku Tuan Padri; mai kita sama bersampi lalu besambiang,

Diatu Tuhan, nya baru kami deka ngara ke pengawa ti enda ngena peda enggau jula mata dua. 

Enti sema ka jaku kami enda siru panggong changka,

Panggong sumbong enda bebasa,

Mua penesal meh kami tu Tuhan di senggal arong dada.

Enggau pengelembut bukai ke enda ulih rintai ka enggau rambai jako serabana,

Kami tu endang enggau ati ti cukup baroh,

Minta Nuan ngampun kami ari kaki nyentok ka pala munjong nyempala,

Laban kami endang nemu Nuan endang ngembuan pengasih, enggau penelap,

Panggong pengerindu pemadu iya,

Laban jaku Nuan endang enggai meda mensia, 

lembut tuboh mati samengat tanggam dosa,

Ke diatu di dunya baroh sentika Bintang bejuang.

 

Terai-terai betenchang ratai,

Aram kitai ke betuboh maioh amai,

Maioh ari beloh ensulai sunagi, banyak ari lemetak Tinting Mikai,

Ngenatai ka sampi pinta kitai ngagai Apai ke dikumbai Allah Taala,

Aram kitai sama besugang lalu besambiang klai regang,

Dalam nama Jesus Kristus anak Kudus Dara Maria.

 

Malam tu kami Tuhan bersampi ka Tuan Archdeacon kami ( The Venerable Joseph Dusit Ijau)

ti ka mindah gawa,

Minta Nuan meri ka iya ati ti mereti dalam kereja,

Enda ngiga upah enda ngiga glamour,

Meri diri ngereja pengawa ka Allah Taala,

Enda begaji tang suka rela,

Ila baru Allah Taala meri ka makota mulia masok Serga meruan lantang bulih penyenang.

 

Kami minta Nuan Tuhan,

Selalu ngintu indai gerija kami St.John, Sibu ka semua centre pegai iya

(serta semua kitai ari Parish bukai ti sama enggau kami ditu) enggau berekat Nuan,

Ari Diatu lalu ka belama iya,

Minta Nuan selalu ngiring Archdeacon Joseph Dusit Ijau, serta sida sebilik,

Awak ka pengawa sida iya nyadi,

Niri ka pengawa Eklisia,

Sekali agi minta Nuan nyaup, merekat serta ngibun,

Minta Nuan ngempong sarakup baru Archdeacon Joseph ba endor ti baru di St. Basil digelar indai gerija di batu Kawa, Kuching,

Kami bersampi awak ka Fr. Joseph bidik lansik nguan menua,

Beri ka iya pemaroh ati mangku kerja,

Ati liat ngingat ka sempekat jaku semaia,

Ngajar orang jalai sembiang nyembah Petara,

Genap ari sebarang maia,

Ngulu ka bala orang di rumah gerija. 

Tebang bu menalu nusu,

Tu baru kitai bersampi ka diri empu. 

Nya alai ka pengujong iya dalam sampi aku Fr. Makos ka mlm tu,

Dalam pendiau, pengawa, pengidup, ati, runding, ulah, jako enggau perangai kami,

Aku bersampi minta Nuan Tuhan agi meda agi nengkila,

Agi merening agi ngiching,

Agi ngemujur agi ngator,

Agi merenong, selalu nyukong,

Agi ngerimbai agi nerabai,

Agi merekat agi nyelamat Fr. Joseph serta kami semua ka ditu begelumu duduk betipan.

 

Enti ati kami tumpul dalam pengawa, asoh kami tajam,

Enti mata kami enda meda, buai empeleman,

Isi kami enggau pengerindu nuan dalam ati.

 

Anang ngasoh kami nugong ka penyumbong,

Baka menyaong tuchong gunung Lingga,

Bisi telaga tumpok tiga pendai Dara Dayang Kumang.

 

Nya alai ke tu bala menyadi,

Minta pengerai meh bala kitai ngagai Apai ke dikumbai Allah Taala,

Minta pengudus meh kitai dalam nama Jesus Kristus anak Kudus Dara Maria,

Awak ka kitai sama bela gerai nyamai,

Sama lantang senang bela mujur dalam kerja,

Awak ka semua kitai bansa Dayak ke deka ngintu Gawai baroh laa bulan mingkai,

Bulih pengerai, umur panjai senang lantang nguan menua.

 

Kebuah pia, laban tu endang udah di- semilah ka Dato’ Sri Anwar Ibrahim,

Perdana Menteri printah Besai,

Dikamat ka Tan Sri Abang Johari Openg Premier Sarawak, di setujuka Datuk Amar Douglas Uggah Embas pengari bansa kitai,

Dikena nanggam bansa Iban, 

Mekoh bansa Bidayuh, ngadu ka Orang Ulu,

Ngambika kitai begulai tegoh enda belaya sama semakai.

Begulai baik baka diri sebilik enggau bansa bukai,

Awak ka kitai sama mupok lalu bejalai nuju penyangkai ator pemansang.

 

Nya alai ke tu Tuhan,

Kami minta sagu ka Nuan ngagai batu tinggi da-dinggai,

Minta Nuan Nerima sampi pinta kami tu dalam nama Jesus Kristus Tuhan Kitai. 

+DALAM NAMA APAI, ENGGAU ANAK, ENGGAU ROH KUDUS. AMEN.