Mitos pasal shofar

 Mitos pasal shofar 

Mitos pasal shofar...

*Kati shofar nya perengka muzik ti tuchi sereta kudus?

*Kati shofar bisi kuasa?

*Kati shofar nya ngundang penatai Tuhan?

*Kati shofar nya ngasuh melikat nolong?

*Kati shofar nya ngasuh sitan begetar?

Saut iya Ukai!

Uji berunding nama kebuah?

Shofar dalam Bup Kudus mayuh disebut. Shofar diguna maya sembiang, perang, tauka kena ngangau sereta ngempuruka orang aja. Taja pia, nadai atur ti spesial ngasuh iya tauka ngasoh iya nyadi amat-amat spesial (chunto iya, peti sempekat enggau perengka rumah sembiang bukai dianggap khas), nadai kebuah orang ti arap ngumbai shofar tauka utai bukai nya nyadika "barang ti kudus".

Shofar nadai kuasa, iya semina tanduk ti belubang, utai ti udah mati. Shofar semina ulih "idup" enti iya ditiup. Pemenang dalam peristiwa sejarah dinding Jeriko enggau bala soldadu Gideon ukai ketegal shofar, tang ketegal "penaluk" ngagai Allah Taala.

Shofar enda ngundang penatai Tuhan. Ari pun Allah Taala seruran ibuhka mensia, ukai utai tauka barang. Iya Kiruhka orang nya, ukai pengerami ti nyadi. Ibuhka penyembah, ukai ketegal puji enggau sembah. Petara ngayanka pengasih Iya ngagai orang ke nebah terumpit/shofar, lalu ukai ngagai utai nya.

Shofar enda ngasuh melikat mindah lalu nolong kitai. Bala melikat semina nunduk ngagai siti aja kuasa, iya nya Allah Taala empu. Enti Jesus kala nyebut baka ni Iya ulih ngempuruka bala melikat dalam sekali aja terumpit, Jesus nadai sekali-kali deka madahka bala melikat nya mindah ketegal shofar. Bala melikat semina mindah nitihka asuh Petara. Shofar ditu nyadika tanda tauka “signal” dalam perang.

Shofar enda ngasuh sitan begetar. Utai ti ngasuh sitan begetar nya kuasa Allah Taala. Kuasa shofar bepanggai ba sapa ke niup iya. Dalam peristiwa Sadrak, Mesak, Abednego, shofar dikena nyadika siti ari perengka muzik ti nyadika tanda orang nyembah patung emas nya. Terang bendar ditu sitan enda takut, indah orang ke nyembah engkeramba pan ngena iya nyempulang sembiang sida. Sitan takutka kuasa Jesus, orang ti arap enti sida deka niup shofar, patut ngereja nya dalam nama Jesus.

Nyadi enti semua mitos nya enda amat, nama kebuah orang Kristian niup shofar?

Ramshofar tauka shofar tanduk bedus ngingatka piring anak domba Allah Taala. Jesus Kristus nyelamatka kitai ngena piring Iya. Kuasa ti dikena kitai ngelaban sitan nya semina kuasa dalam nama Jesus Kristus. Orang ti arap ngena shofar laban shofar (tanduk bedus) bisi disebut sereta dikena dalam Bup Kudus. Siti perengka semula jadi ti suah dikena sereta disebut dalam Surat Sempekat Lama enggau Surat Sempekat Baru (Epistola). Sechara eskatologi, kitai niup shofar nyadika pengingat Jesus, Raja, deka datai ngambi semua kitai datai lalu arapka Iya.