RAMBAI SAMPI PENUTUP PENGAWA

 

SAMPI PENUTUP PENGAWA

 

+Dalam nama Allah Apai enggau Anak enggau Roh Kudus. Amin

 

(Tu sampi geliga ari aku Fr. Makos Mark Luna.)

Ni bala kita maioh, kita banyak ,

baik ka tuai, enggau ti biak,

Uji ngetu dulu kita bejako diau jenoh anang ragak,

Tatam Iban ke begepan, bebaju burong lekat gagong bulu ruai,

Nyerumba ari gemeri manah amai,

Sebedau tembai kitai pulai ka pejurai pengawa kitai.

 Nyadi aku tu………

Baka paku sulur gelung,

Baka tubu sulur rebung,

Baka kulat sulur tuchung,

Baka tengang tampung bulang,

Baka ijuk tampung penduk,

Baka wi tampung tali,

Baka rutan tampung danan,

Pechah periuk tanah, ganti periuk besi,

Charik labung batik, ganti labung Betawi,

Parai orang ka tuai, ganti tubuh kami,

Padam bulan ganti matahari…………

 

Kebuah bakanya,

Laban aku deka besampi-

Sampi pulai, ukai deka muru muai,

Deka ngenataika pinta selada kitai,

Ngagai Jesus anak Maria dara pandai,

Ngena cara jaku tuai,

Kedua nama dikumbai sambiang.

 

Nya ka terinting puting dabong Seleka,

Enggi aku; Fr. Makos Mark Luna,

Mai orang besambiang ngadap Petara,

Ka mlm tu iya enda bakanya,

Sampi kitai kediatu dikena ngelai ujung pengawa,

Minta kitai diau jenuh enda lama,

Awak ka minta selada kitai ngagai Allah Taala Petara dunia.

 

Tebang bediri menteli laki,

Tu aku Tuan Padri; mai kita sama bersampi lalu besambiang,

Diatu Tuhan, nya baru kami deka ngara ke pengawa ti enda ngena peda enggau jula mata dua.

 

Enti sema ka jaku kami enda siru panggong changka,

Panggong sumbong enda bebasa,

Mua penesal meh kami tu Tuhan di senggal arong dada.

Enggau pengelembut bukai ke enda ulih rintai ka enggau rambai jako serabana,

Kami tu endang enggau ati ti cukup baroh,

Minta Nuan ngampun kami ari kaki nyentok ka pala munjong nyempala,

Laban kami endang nemu Nuan endang ngembuan pengasih, enggau penelap,

Panggong pengerindu pemadu iya,

Laban jaku Nuan endang enggai meda mensia,

lembut tuboh mati samengat tanggam dosa,

Ke diatu di dunya baroh sentika Bintang bejuang.

 

Terai-terai betenchang ratai,

Aram kitai ke betuboh maioh amai,

Maioh ari beloh ensulai sunagi, banyak ari lemetak Tinting Mikai,

Ngenatai ka sampi pinta kitai ngagai Apai ke dikumbai Allah Taala,

Aram kitai sama besugang lalu besambiang klai regang,

Dalam nama Jesus Kristus anak Kudus Dara Maria.

 

(Diatu kitai bersampi kena merekat ka semua bala ti dalam pengawa tu)

Tebang bu menalu nusu,

Tu baru kitai bersampi ka diri empu.

 

Malam tu kami Tuhan bersampi ka pemulai bala kami,

Minta Nuan Tuhan meri ka kami ati ti mereti,

Kami minta Nuan Tuhan,

Selalu ngintu kami, maya kami pulai kami bejalai kaki tauka ngena kerita,

Minta Nuan selalu ngiring pulai nadai apa nadai nama

Sangkai Dalam selamat ulih ibun saup Darah Anak Domba,

Minta Nuan ngempong nyerakup kami ke mlm tu,

Awak ka sama bidik lansik nguan menua,

Beri ka kami pemaroh ati lebuh kami belabuh mangku kerja,

Ati liat ngingat ka sempekat jaku semaia,

Ingat ka jalai sembiang nyembah Petara,

Genap ari sebarang maia,

Awakka ingat enda lupa,

Sama beiring ngaggai rumah gerija.

 

Nya alai ka pengujong iya dalam sampi aku Fr. Makos Mark Luna saritu tu,

Dalam pendiau, pengawa, pengidup, ati, runding, ulah, jako enggau perangai kitai,

Aku bersampi minta Nuan Tuhan agi meda agi nengkila,

Agi merening agi ngiching,

Agi ngemujur agi ngator,

Agi merenong, selalu nyukong,

Agi ngerimbai agi nerabai, Awakka gayu, guru!

Awakka gerai nyamai!

Awakka Kaya Raja nguan menua!

Kami minta jalai bidik enggau lansik,

Minta betuah minta belimpah,

Minta gerai minta nyamai

Minta chelap minta embap.

Terus merekat agi nyelamat ka sida tu be-empu pengawa tu… (_Nama Pengawa___….)

serta kami semua ka ditu begelumu duduk betipan.

 

Enti ati kami tumpul dalam pengawa, asoh kami tajam,

Enti mata kami enda meda, buai empeleman,

Isi kami enggau pengerindu nuan dalam ati.

 

Anang ngasoh kami nugong ka penyumbong,

Baka menyaong tuchong gunung Lingga,

Bisi telaga tumpok tiga pendai Dara Dayang Kumang.

 

Nya alai ke tu bala menyadi,

Minta pengerai meh bala kitai ngagai Apai ke dikumbai Allah Taala,

Minta pengudus meh kitai dalam nama Jesus Kristus anak Kudus Dara Maria,

Awak ka kitai sama bela gerai nyamai,

Sama lantang senang bela mujur dalam kerja,

Awak ka semua kitai baroh laa bulan mingkai,

Bulih pengerai, umur panjai senang lantang nguan menua.

 

Nya alai ke tu Tuhan,

Kami minta sagu ka Nuan ngagai batu tinggi da-dinggai,

Minta Nuan Nerima sampi pinta kami tu dalam nama Jesus Kristus Tuhan Kitai.

+ Dalam Nama Apai enggau Anak Enggau Roh Kudus. AMEN