SAMPI GAWAI DAYAK KAMC 2024 (19 May 2024- Pentikos)

 

SAMPI GAWAI DAYAK KAMC 2024 (19 May 2024- Pentikos)

(Gambar bala ari Kapit Anglican Mission  Centre)

Dalam nama Allah Apai enggau Anak enggau Roh Kudus. Amin

 

Uji ngetu dulu kita ke sebubu baru datai,

Gulu indu kaban besai,

Tatam Iban ke begepan, bebaju burong lekat gagong bulu ruai,

Nuntong di perabong Gerija besai,

Nyerumba ari gemeri manah amai,

Datai besambiang nyambut Hari gawai Kitai,

Sebedau tembai kitai pulai ka pejurai rumah panjai.

 

Kebuah bakanya,

Laban enti aku deka besampi 

Mun ka pengerami ngintu gawai,

Deka ngenataika pinta selada kitai,

Ngagai Jesus anak Maria dara pandai,

Ngena cara jaku tuai,

Kedua nama dikumbai sambiang.

 

Tuai  : Ooo.. Tuhan ulih pengasih Nuan…

Semua: Dinga ka sembiang kami.

 

Enda aku busong laya dajan,

Nyebut nama orang ke udah laya dulu padam,

Niang Adam laki Awa,

Enda aku busong laya simpak,

Nyebut nama orang ke bebadi laya ruyak,

Niang Isak anak Abraham seduai Sarah,

Enda aku busong laya lalu,

Nyebut nama orang ke laya dulu pambu,

Niang Andrew menyadi peter,

Enda aku busong laya sulai,

Nyebut nama Bishop enggau paderi,

Keudah lesi dulu nadai.

 

Nama pemusung nama pengelunggung aku deh,

Pala enggi aku udah di sungga di laa dulang baptisa,

Laban pala aku udah ditanda puting tunjuk dua,

Udah di kelai enggau tanda regang nyadi Rasul Tuhan Jesus,

Udah di chiri nyadi paderi ti dikumbai Father,

Nya meh kebuah lapa kita selalu meda aku,

Leboh sembiang ari minggu maya dia,

Bebaju panjai berselampai gadong mirah kesumba,

Mai kitai nyanyi muji Allah Taala,

Ngulu ka bala kitai sembiang di mua gerija.

 

 

 

Nama tai ke beraoh inggar bemunyi,

Munyi pangka bena gumbang tsunami,

Mangka ka tisi tasik Sumatra,

Nama utai beraoh inggar manjong,

Munyi pangka bena gumbang besabong,

Mangka ka tanjong pulau Jawa.

 

Nama utai ke braoh inggar rengangai,

Munyi serintak sabak anak andai,

Pia ko bala Padri ke udah lesi dulu nadai,

Ti ngenyinu ke leku tangkai kamai,

Ngasoh ati ti berai gila selemai laboh salimas ai mata.

 

O Enti munyi nya,

Uji pending ka enggau manah jako bala katikis serta lay readers,

Uji tentuka ka jako Andrew menyadi Peter.

 

Nya ka terinting puting dabong Seleka,

Enggi aku; Fr. Makos Mark Luna,

Mai orang besambiang ngadap Petara,

Ngerami Hari Gawai Dayak taun ke dia,

Ngajar kitai ka diau di dunia pulai ka Serga,

Sampal nurun ngabas sida ke baroh laa bulan pernama,

Ngelengka ka taun ke lama,

Nyambut taun ke dia ngena chara atur sambiang gerija.

 

Tuai  : Ooo Tuhan.. ulih pengasih Nuan…

Semua: Dinga ka sembiang kami.

 

Nya alai peda kita enggau jula mata nampai,

Pua kumbu tak merundu udah kerembai,

Atas Alta lekat batu bata kuai,

Nya ga endang klai dikena sida niang aki ke udah rimpi dulu sulai,

Nerayong pandong gawai sempuli padi merakai,

Di penjurai rumah panjai.

 

Tang ka pagi iya enda bakanya,

Pua kumbu tu dikena ngelai pengawa mela gawai,

Gawai Dayak kitai Gawai Dayak ngelengka ke taun ke lama nyambut taun ke datai,

Dikena bepinta ngagai Petara, Minta diri gayu guru gerai nyamai,

Nguan menoa umur panjai bulih peyenang.

 

Tebang bediri menteli laki,

Tu baru aku Tuan Padri; mai kita sama bersampi lalu besambiang,

Diatu Tuhan, nya baru kami deka ngara ke pengawa ti enda ngena peda enggau jula mata dua,

Deka madah macham penyalah, pengawa kamah di kumbai dosa,

Deka ngenang maioh penimpang lembau sambiang nurun ka grija.

Deka ngaku pengawa saru enda ngintu Hari minggu nyambut Sakramen Eukarista,

Deka ngara ka leka laya, enda ulih tesa enggau bila jari dua,

Enggai belajar ka Bup Kudus, enda aus ka jaku Allah Taala.

 

Enti sema ka jaku kami enda siru panggong changka,

Panggong sumbong enda bebasa,

Mua penesal meh kami tu Tuhan di senggal arong dada.

Enggau pengelembut bukai ke enda ulih rintai ka enggau rambai jako serabana,

Kami tu endang enggau ati ti cukup baroh,

Minta Nuan ngampun kami ari kaki nyentok ka pala munjong nyempala,

Laban kami endang nemu Nuan ngembuan pengasih, enggau penelap,

Panggong pengerindu pemadu iya,

Laban jaku Nuan endang enggai meda mensia, lembut tuboh mati samengat tanggam dosa,

Ke diatu di dunya baroh sentika Bintang bejuang.

 

Tuai  : Ooo Tuhan.. ulih pengasih Nuan…

Semua: Dinga ka sembiang kami.

 

Terai-terai betenchang ratai,

Aram kitai ke betuboh maioh amai,

Maioh ari beloh ensulai sunagi, banyak ari lemetak Tinting Mikai,

Ngenatai ka sampi pinta kitai ngagai Apai ke dikumbai Allah Taala,

Aram kitai sama besugang lalu besambiang klai regang,

Dalam nama Jesus Kristus anak Kudus Dara Maria.

 

Keterubah kitai besambiang ka Bishop Datuk Danald Jute enggau sapit iya Bishop Andy Shie,

Awak ka seduai iya mujur dalam pengawa lantang dalam kerja,

Gerai nyamai dalam pengelantang,

Kitai besampi ka semua bala Padri sida Deacon nyengkaum Readers,

Lebih agi kitai bersampi ka aku…. Fr. Makos sulu Rose,

Minta Nuan ngiri kami enggau penemu ati rajin dalam kerja,

Liat ati nempoh penguji cabar dunya,

Ngintu samengat enggai ka orang tesat dalam pengarap salah kerja,

Ngelusu sambiang lembau ka grija,

Enda tekala tetanda tiang regang.

 

Kami mega Tuhan bersampi ka kaban PCC St John, Sibu serta bala komiti Gerija KAMC,

Gerempong Indu Indai Gerija, raban anembiak serta enggau bala choir -server,

Minta Nuan meri ka sida ati ti mereti dalam kereja,

Enda ngiga upah enda ngiga glamour,

Meri diri ngereja pengawa ka Allah Taala,

Enda begaji tang suka rela,

Ila baru Allah Taala meri ka kita makota mulia masok Serga meruan lantang bulih penyenang.

Tuai  : Ooo Tuhan.. ulih pengasih Nuan…

Semua: Dinga ka sembiang kami.

 

Kami mega besampi ka menoa kami tu,

Menoa Sarawak nyengkaum Sabah enggau semenanjung Malaysia,

Ka yang di-Pertuan Agong, Perdana Menteri enggau Kerabat di Raja,

Besampi ka TYT Tuai Menua, Premier Sarawak enggau semua cabinet iya,

(Kitai bersampi ka pengari kitai Datuk Amar Douglas Uggah Embas, Dato Sri Alexander Nanta Linggi enggau Datin Sri)

Besambiang ka sida ke gawa Perintah,

Awak ka sida ngembuan perangai ti manah, enda kena laban rasuah pechah rumah kerja,

Besampi ka sida Tuai Rumah, nyangkong Temenggong kedua Pemancha,

Sida Penghulu, bala Polis nyengkaum soldadu enggau bala kunsilor,

Beri ka sida pemereti ati landik dalam kerja,

Awak ka menua kami tu mujur dalam segi ekonomi serta teknologi media massa,

Ngambi ka ngamat ka julok ati Perdana Menteri menua Malaysia,

Diauk bebaik bepupu bansa,

Megai pengarap suka rela,

Nya meh ke tanda menua kitai amat udah Merdeka,

Diberi nama Malaysia Madani.

 

Kami mega bersampi ka uchu-ambu anak kami,

Ke agi belajar ari luar tasik China,

Nyangkong sida ke di Semenanjung Tanah Malaya,

Anang ngasoh sida iya babal, anang tasal,

Tang beri ka sida bulih pelajar pangkat Diploma tauka Master,

Asoh ati sida iya nyeligi baka besi bari kemuja,

Awak ka sida enda beleman masok ka Universiti,

Ngambi degree nyadi engineer,

Sekeda sida nyadi lawyer ngemata ke pekara batang udang-undang.

 

Kami mega besampi ke bala Wakil Rakyat,

Awak ka sida selalu bejimat ngingat ka sempekat jaku semaia,

Sidak ke nyadi cikgu digelar pengajar dikumbai master,

Beri ka sida ati luar runding pintar,

Ngajar nembiak dalam skula,

Sidak ka nyadi polis nyadi soldadu, minta nuan selalu ngintu,

Awak ka sida enda lebu nyaga menua.

 

Kitai mega besampi ka bala kitai ke agi ngemeran ka pengawa bumai,

Nanam belayan padi bukit padi paya,

Awak ka padi sida iya nyadi munjong nyempala,

Sida ke nangkal getah minta ari selalu manah,

Awak ka enda basah endor bekerja,

Sida ke bekebun lada bela dikemata,

Sida ke gawa ba ladang sawit,

Asoh sida selalu gagit ngulih ka duit ringgit untung bunga.

Tuai  : Ooo Tuhan.. ulih pengasih Nuan…

Semua : Dinga ka sembiang kami.

 

Tebang kepit berangan bukit,

Tu baru kitai bersampi ka sida ti enda dapat panggong sakit.

Minta Allah Taala negu tuboh sida awak ka bulih pengerai baka selama,

Minta Allah Taala merekat ka pengawa sida bidan, indu misi, bala lutor enggau derisa,

Awak ka ubat ti dipakai sida jampat ngasoh sida iya gerai ulih bedaya,

Beseput Lantang ulih Darah serta nama Anak Domba ti mati di kayu regang,

Ngerai, nyuman, muai, ngesai, semua penyakit ulih nama Jesus Kristus Penebus  kami ti endang Raja.

 

Kami mega Bersampi ka samengat sida ke udah mati menya dulu laya,

Awak ka Nuan selalu ngintu semengat sida iya,

Awak ka samengat sida diau dalam pengelantang.

 

Tuai  : Ooo Tuhan.. ulih pengasih Nuan…

Semua : Dinga ka sembiang kami.

 

Tebang bu menalu nusu,

Tu baru kitai bersampi ka diri empu.

 

Kami minta Nuan Tuhan,

Selalu ngintu gerija kami Kapit Anglikan Mission Centre serta Lighthouse of Hope, Kapit enggau berekat Nuan,

Ari Diatu lalu ka belama iya,

Minta Nuan selalu ngiring kaban komiti,

Awak ka pengawa sida iya nyadi,

Niri ka pengawa Eklisia,

Sekali agi minta Nuan nyaup, merekat serta ngibun Tuan Bishop, bala Padri, enggau Readers,

Minta Nuan ngempong sarakup sida indu, digelar indai gerija,

Minta Nuan merekat ka semua ruang bilik kami di Parish nyengkaum Centre tu,

Awak ka kami bidik lansik nguan menua,

Beri ka kami pemaroh ati mangku kerja,

Ati liat ngingat ka sempekat jaku semaia,

Ngajar orang jalai sembiang nyembah Petara,

Genap ari sebarang maia,

Ngulu ka bala orang di rumah gerija.

 

Tuai  : Ooo Tuhan.. ulih pengasih Nuan…

Semua : Dinga ka sembiang kami.

 

Nya alai ka pengujong iya dalam sampi kami pagi tu,

Dalam pendiau, pengawa, pengidup, ati, runding, ulah, jako enggau perangai kami,

Kami bersampi minta Nuan Tuhan agi meda agi nengkila,

Agi merening agi ngiching,

Agi ngemujur agi ngator,

Agi merenong, selalu nyukong,

Agi ngerimbai agi nerabai,

Agi merekat agi nyelamat kami.

 

Enti ati kami tumpul dalam pengawa, asoh iya tajam,

Enti mata kami enda meda, buai empeleman,

Isi kami enggau pengerindu nuan dalam ati,

Enti kami bisi ati kepapas, buai ketisi.

 

Anang ngasoh kami nugong ka penyumbong,

Baka menyaong tuchong gunung Lingga,

Bisi telaga tumpok tiga pendai Dara Dayang Kumang.

 

Tuai  : Ooo Tuhan.. ulih pengasih Nuan…

Semua : Dinga ka sembiang kami.

 

Nya alai ke tu bala menyadi,

Minta pengerai meh bala kitai ngagai Apai ke dikumbai Allah Taala,

Minta pengudus meh kitai dalam nama Jesus Kristus anak Kudus Dara Maria,

Awak ka kitai sama bela gerai nyamai,

Sama lantang senang bela mujur dalam kerja,

Awak ka semua kitai bansa Dayak ke deka ngintu Gawai baroh laa bulan mingkai,

Bulih pengerai, umur panjai senang lantang nguan menua.

 

Kebuah pia, laban tu endang udah di- semilah ka Dato’ Sri Anwar Ibrahim,

Perdana Menteri printah Besai,

Dikamat ka Tan Sri Abang Johari Openg Premier Sarawak, di setujuka Datuk Amar Douglas Uggah Embas pengari bansa kitai,

Dikena nanggam bansa Iban, Mekoh bansa Bidayuh, ngadu ka Orang Ulu,

Ngambika kitai begulai tegoh enda belaya sama semakai.

Begulai baik baka diri sebilik enggau bansa bukai,

Awak ka kitai sama mupok lalu bejalai nuju penyangkai ator pemansang.

 

Nya alai ke tu Tuhan,

Kami minta sagu ka Nuan ngagai batu tinggi da-dinggai,

Minta Nuan Nerima sampi pinta kami tu dalam nama Jesus Kristus Tuhan Kitai.

 

 

Kitai sama nelah, Apai ti kasih

Semua: Sambut sembiang kami, tegal Anak Nuan, Jesus Kristus ti Penebus Kami.

Haleluyah…Amen.