SAMPI SEMBIANG RABAT/ NGINGAT KA ORANG MATI

 

SAMPI SEMBIANG RABAT/ NGINGAT KA ORANG MATI

   (Semina gambar pengias)

+Dalam nama Allah Apai enggau Anak enggau Roh Kudus. Amen.

 

(Tu sampi rabat ari aku Fr. Makos Mark Luna.)

Ni bala kita maioh, kita banyak ,

baik ka tuai, baik ka biak,

Baik ka udah punas, tauka bisi anak,

Uji ngetu dulu kita bejako diau jenoh anang ragak.

 

Nyadi aku tu………

Baka paku sulur gelung,

Baka tubu sulur rebung,

Baka kulat sulur tuchung,

Baka tengang tampung bulang,

Baka ijuk tampung penduk,

Baka wi tampung tali,

Baka rutan tampung danan,

Pechah periuk tanah, ganti periuk besi,

Charik labung batik, ganti labung Betawi,

Parai orang ka tuai, ganti tubuh kami,

Padam bulan ganti matahari…………

 

(Jaku madah ka pengawa Diri Fr. Makos Anak Mark Luna)

Enda aku busong laya dajan,

Nyebut nama orang ke udah laya dulu padam,

Niang Adam laki Awa,

Enda aku busong laya simpak,

Nyebut nama orang ke bebadi laya ruyak,

Niang Isak anak Abraham seduai Sarah,

Enda aku busong laya lalu,

Nyebut nama orang ke laya dulu pambu,

Niang St. Andrew menyadi St. Peter,

Enda aku busong laya sulai,

Nyebut nama Bishop enggau paderi,

Keudah lesi dulu nadai.

 

Nya ka terinting puting dabong Seleka,

Enggi aku; Fr. Makos Mark Luna,

Mai orang besambiang ngadap Petara,

Ka maya tu iya enda bakanya,

Sampi kitai kediatu awakka

Bersampi ka samengat sida ke udah mati dulu laya,

Awak ka Nuan selalu ngintu semengat sida iya,

Awak ka samengat sida diau dalam pengelantang,

Serta mega kitai bersampi minta dilindung, diserayung,

Sida sebilik, sida serumah,

Minta kitai diau jenuh enda lama,

Awak ka minta selada kitai ngagai Allah Taala Petara Serga ti meruan belama.

 

(Besampi ka bala ti lesi rimpi mabun patah)

Tebang bediri menteli laki,

Tu aku Tuan Padri; Fr.Makos mai kita sama bersampi lalu besambiang, ngagai Jesus Kristus, Anak Domba Allah Taala,

Bersampi ka (...sanu...) ti udah dulu midang ninggal ka kitai.

 

Tanah langgong bangat enda tepegaika nuan ti pumpung ti alai nemu paung pugu sengkenyang.

Nama kabuah tinting panjai bangat enda tepegaika nuan ti sulai, …ti endur orang ngaga rumah panjai ti nejai ngakar tengang?

Nama kabuah taba bangat enda tepegaika nuan ti tejula, aki Kenyali Lia….Ti endur alai ngaringka batang?

Lapa tenung ai bangat enda tepegaika nuan ti rimpi, …Mengkuli lebu ngapa nuan ngiri lemai ngabas puang sigi padi embawang?

Lapa tiang bumbung bangat enda tepegaika nuan ti pumping, …jelu Rengayung alai nuan nyangking ka tuchung raga menang?

Lapa sabar bangat enda tepegaika kita ti rimpi, deh Mengkuli, …Lebu ngapa ngaga kita baka pengrijik impun enseluang?

Lapa gelegar bangat enda tepegaika nuan deh Ruai Danan? ....Lebu ga ngelar nuan baka ijuk ijar punggang tembawang.

Lapa luan ranggung bangat enda tepegaika kita ti pumpung deh jelu Rengayung?...Lebu ngapa ngelar kita penunduk benung tajau Bujang.

Lapa tukang atap bangat enda tepegai ka kita ti tumpat, Ruai Berambat?...Lebu ngapa ngelar kita reringkap peninggang sinang.

 

Nya kami ninga Sada Petara muak ke langit,

Ari menyaong tuchong gunong cherai,

Kena kelingi ai tebang Dagang,

Leboh tandang Iya ti ngaga Adam laki Hawa,

Kami diatu begelumu ditu enggau sida sebilik,

Kaban belayan serta serumah bukai,

Bersampi awak ka iya (…sanu…) likun,

Semengatnya di ibun enggau terekun Allah Taala Serga.

Awak ka melikat ngambi samengat mulai ka roh,

Pulai ke rumah Petara langit,

Di puchok batu peredah patah beliung,

Pumpong iya bulih disambut bala melikat maioh beraban,

Di peda nuan Apai nganti di pintu serga,

Tuchum manah tanda.

 

Mesit-mesit ujan ari langit,

Silup enggau daun kumpang belembang.

Nyadoh kitai betubuh nyambut nurun Anak Domba,

Mai pulai (…@Apai,…@ayak...@aki..@menyadi…) ti lesi dulu nadai,

Tangkup langit entilang remang.

 

Nya alai aku ke bediri kaya-kaya,

Megai bup kudus becorak warna,

Ukai laban aku bangat galak lain baka.

Aku tu nunda adat gerija kitai ke ari kalia jeman maya.

Aku tu meri kita tabi, kedua iya adat basa,

Meda kita ke betuboh mua pemaioh betunga mua.

Kita tu endang datai ngena timpuh abis semaia;

Nadai alai kitai ngintai ka mimpi tinduk lina,

Nadai alai kitai ngintai ka ngigau diau di menoa,

Diatu kitai datai ngesah penusah pemati enda terpadah, enda beberita.

Pia aku ngajar deka ngesah,

Sida ti rimpi mabun patah enda pulai ke sebayan menuo malam udu petang,

Tang terus ka serga maya ka dia,

Begulai enggau Allah Taala ti bemulia,

Raja terang pengari dilangit,

Nya kebuah orang ti rimpi gali sulai,

Enda begunaka baya serta pemakai,

Sida enda nemu haus enda nemu lapar agi,

Cukup nungkun dian, beri tanda bungai,

Pemakai patut dikunsika, patut disediaka,

Ngagai sida ti agi idup, ngenseput beguna amai,

Agi ka diau segulai,

Awak ka bisi buah kenang,

ila jeman maya kitai badu berimbai.

(Nya jako tangkan aku ka kitai semua.)

 

Nyangka kita bisi kena sipat mimpi ringat,

Kena pansa mimpi bisa,

Leboh kita ke nepan bas niki kereta,

Sepamanjai jalai sebelah menoa.

Nyangka kita ke bisi laboh pimpin,

Ke bemain ba jalai raya,

Nyangka kita bisi raup ke ngelikup mansa mua.

Nyadi aku bersampi sekali meri jako Allah Taala,

Nadai iya apa agi ko Petara,

Gerai nyamai ko Jesus anak Maria,

Lantang senang diau dalam pengasih Raja Mulia.

 

Nyangka kita bisi salah ngigau nyandau malam,

Bisi ngigau irau begawan,

Nyangka bisi sipat mimpi ringat kena pansa mimpi rawan,

Nyangka leboh kita ke nait bas niki mantuka,

Enggau di semanjai jalai sebelah utan,

Nyangka kita bisi salah pimpin ke bemain sabelah jalan,

Nyangka kita ke bisi labuh raup ke ngelikup kiba-kanan,

Enti kitai udah bersampi udah tu lagi,

Tabar iya, laar buai ka bukai.

 

(Diatu bersampi muai ati nangi)

Laban kami arap serta nemu Nuan Tuhan ngaga semua macam leman utai,

Baka burung, baka ular, lembayar, jelu babas enggau ikan.

Ulih kuasa nuan, awakka sida ketupong sida bejampong, nyawa kijang, nyawa beruang, nyawa punggu Guntur mabu,

Nadai pengasi nadai penyidi,

Nadai pemisa, nadai bedaya,

Asoh tasal, asoh tabar,

Buai abis buai lengis,

Utai ti ngasoh ati nangi,

Ngasoh ati beraie, Ngasoh runding kakang enda arap ka Nuan.

Anang ngasoh sitan enggau utai jai nguji kami,

Dinding roh, samengat enggau tubuh kami,

Kering ka pengarap kami,

Awakka Roh kudus ngemata nunjukka jalai kami,

Minta Tuhan ngelindung, ninding kami ari panah musuh ti enda dipeda,

ti ulih ngerusak tubuh enggau semengat kami,

Laban Kami nadai be-arap ka nyawa utai ti idup,

Sebelah babas, sebelah renggas,

Laban Kami be-arap ka Nuan siko aja,

Allah Taala meruan bekuasa.

Kami nyerah sampi tu ulih Darah Anak Domba serta nama penebus, Jesus Kristus Tuhan kami. Amen.

 

(Enti bersampi leboh jai mimpi)

Tuhan Allah ti ngiar semua penakut,

Semua utai ti ulih ngerusak tubuh,

Kami manggai ka diri serta arapka Nuan.

Leboh kami tindok ngenatka diri

Awak ka kami nadai mimpi ransi mimpi kudi, mimpi remban,

Mimpi rawan, mimpi kebawan,

Kami nadai arapka mimpinya tau nyadi segenda, nyadi nyata,

Kami minta mimpinya tabar-lar, nadai apa nadai nama.

Asoh mimpinya kubau-rumbau,

Nadai pengasi, nadai penyidi,

Nadai kena kacau, kena regau,

Kuasa penguji, kuasa penakut, kuasa pemetang ari sitan.

Beri kami mimpi manah, mimpi bertauh,

Mimpi bulih padi bulih puli,

Bulih reta bulih pengeraja,

Bulih umur panjai, bulih pengerai nguan menua,

Ulih Darah anak Domba,

Ulih nama penebus, Jesus Kristus Tuhan ti penyelamat kami.

Amen.

 

(Aram kitai sama bersampi minta pengampun)

Diatu Tuhan Petara semua mensia,

Enti sema jaku kami enda siru panggong changka,

Panggong sumbong enda bebasa,

Mua penesal meh kami tu Tuhan di senggal arong dada.

Enggau pengelembut bukai ke enda ulih rintai ka enggau rambai jako serabana,

Kami tu endang enggau ati ti cukup baroh,

Minta Nuan ngampun kami ari kaki nyentok ka pala munjong nyempala,

Laban kami endang nemu Nuan endang ngembuan pengasih, enggau penelap,

Panggong pengerindu pemadu iya,

Laban jaku Nuan endang enggai meda mensia,

lembut tuboh mati samengat tanggam dosa,

Ke diatu di dunya baroh sentika Bintang bejuang.

 

Sigi amat enda patut Nuan datai,

Nuan sangkai ba bilik, ba penaik kami orang ti bedosa,

laban kami suah ngelaban Nuan ketegal pengelemi ati,

pengarap puntan laban dosa.

Tang kami kempang nanya berani minta,

laban kami ingatka diri udah dibai bebaik enggau Nuan,

ditebus ulih Darah anak Domba,

ulih pemarai enggau pengangkat Anak Nuan,

Jesus Kristus Tuhan semua kami mensia.

Lalu ulih sakramen baptisa, kami dibai saum pengidup enggau Nuan

sereta diberi kuasa tau besembiang barang maya,

barang endor minta berekat minta tungkat, minta sukong,

minta tolong minta serayong ari Raja Serga.

 

Nya alai kami minta Nuan, Apai,

Merekat (semua) sida sebilik tu, ngambika sida sebilik begulai nyamai,

nadai laya, nadai utai ngawa,

tang diau dalam pengerindu Nuan, Allah Taala.

Ati sida asuh tuchi asuh beresi,

lepaska sida ari runding enggau ati ti mai enda nangika Nuan.

 

Bilik sida tu asuh beresi, asuh tuchi,

asuh rurus, asuh kudus, 

asuh chelap, asuh lindap,

asuh senang, asuh lantang,

asuh mansang, asuh nyegang,

enda senika, enda menawa.

Ngambika sida gayu guru, gerai nyamai,

diau begulai enggau Nuan, Apai; enggau sesama sida, serta enggau pangan diri.

Ngambika semua rayat (…TR … Nama Menuo ….) nemu lalu ngelala,

Minta Nuan semampai diau ditu enggau sida belama.

 

Enti ati kami tumpul dalam pengawa, asoh kami tajam,

Enti mata kami enda meda, buai empeleman,

Isi kami enggau pengerindu nuan dalam ati.

 

Anang ngasoh kami nugong ka penyumbong,

Baka menyaong tuchong gunung Lingga,

Bisi telaga tumpok tiga pendai Dara Dayang Kumang.

 

Nya alai ke tu Tuhan,

Kami minta sagu ka Nuan ngagai batu tinggi da-dinggai,

Minta Nuan Nerima sampi pinta kami tu dalam nama Jesus Kristus Tuhan Kitai.

+ Dalam Nama Apai enggau Anak Enggau Roh Kudus. AMEN