SEMBIANG BEREKAT BILIK (Kerja Perabung, nutup dinding)

 

SEMBIANG BEREKAT BILIK 

(Kerja Perabung, nutup dinding)

                               (Semina gambar pengias)

Sampi tu dikarang kena bersembiangka bala ti deka ngelekat ka tiang perabung di Rumah TR William Unchat, Ulu Yong. Jako berkat paderi serta rambai jako geliga dikena dalam sampi tu. 

(Semua Diau Jenoh)

Jako Tuhan Dalam Bup Kudus pasal Merkatka rumah

1.    1 Samuel 25:6 “..... Iya ngajihka nuan enggau kita sebilik, enggau semua bala nuan bela gerai nyamai magang.”

2.   Jako dalam 24:3-4 “Ulih penemu-dalam, rumah digaga, lalu ulih pemereti ati, rumah didirika. 4Ulih penemu, bilik diisi enggau utai ti manah sereta berega.”

3.   Ulang Adat 28:6 “Kita deka diberekatka lebuh kita mupuk, enggau lebuh kita pulai.

4.   Jako Dalam 3:24 “Nuan enda takut lebuh nuan deka tinduk, lalu nuan deka tinduk jenak sepemanjai malam.”

 

Dalam Nama Apai enggau Anak, enggau Roh Kudus. Amen.

 

(Tu Sampi Pemuka Leka geliga aku Fr. Makos Mark )

Nama tai ke beraoh inggar bemunyi,

Munyi pangka bena gumbang tsunami,

Mangka ka tisi tasik Sumatra,

Nama utai beraoh inggar manjong,

Munyi pangka bena gumbang besabong,

Mangka ka tanjong pulau Jawa.

 

Nama utai ke braoh inggar rengangai,

Munyi serintak sabak anak andai,

Pia ko bala Padri ke udah lesi dulu nadai,

Ti ngenyinu ke leku tangkai kamai,

Ngasoh ati ti berai gila selemai laboh salimas ai mata.

 

Ooo Enti munyi nya,

Uji pending ka enggau manah jako bala katikis serta lay readers,

Uji tentuka jako St. Andrew menyadi st. Peter.

 Nyadi aku tu………

Baka paku sulur gelung,

Baka tubu sulur rebung,

Baka kulat sulur tuchung,

Baka tengang tampung bulang,

Baka ijuk tampung penduk,

Baka wi tampung tali,

Baka rutan tampung danan,

Pechah periuk tanah, ganti periuk besi,

Charik labung batik, ganti labung Betawi,

Parai orang ka tuai, ganti tubuh kami,

Padam bulan ganti matahari…………

 

Nya ka terinting puting dabong Seleka,

Enggi aku; Fr. Makos Mark Luna,

Mai orang besambiang ngadap Petara,

Ka saritu tu iya enda bakanya,

Pengawa kami tu dikena ngelai Pengawa besampi ka bilik merkat ka rumah,

Udah ngentak niri ka tiang, ka nyambung perabung, ka nampal ka dinding endor rayat diau jenoh ngendoh ka diri.

 

(Diatu dulu aku mai kitai Sampi pengampun)

Tebang bediri menteli laki,

Tu aku Tuan Padri; mai kita sama bersampi lalu besambiang,

Diatu Tuhan, nya baru kami deka ngara ke pengawa ti enda ngena peda enggau jula mata dua.

 

Enti sema ka jaku kami enda siru panggong changka,

Panggong sumbong enda bebasa,

Mua penesal meh kami tu Tuhan di senggal arong dada.

Enggau pengelembut bukai ke enda ulih rintai ka enggau rambai jako serabana,

Kami tu endang enggau ati ti cukup baroh,

Minta Nuan ngampun kami ari kaki nyentok ka pala munjong nyempala,

Laban kami endang nemu Nuannya endang ngembuan pengasih, enggau penelap,

Panggong pengerindu pemadu iya,

Laban jaku Nuan endang enggai meda mensia,

lembut tuboh mati samengat ditanggam dosa,

Ke diatu di dunya baroh sentika Bintang bejuang.

 

Terai-terai betenchang ratai,

Aram kitai ke betuboh maioh amai,

Maioh ari beloh ensulai sunagi, banyak ari lemetak Tinting Mikai,

Ngenatai ka sampi pinta kitai ngagai Apai ke dikumbai Allah Taala,

Aram kitai sama besugang lalu besambiang klai regang,

Dalam nama Jesus Kristus anak Kudus Dara Maria.

 

O Allah Taala ti Apai Jesus Kristus, Penebus dunya.

Nuan mega Apai kami mensia.

Kami ngangauka Nuan ti Tuhan, Raja meruan belama, ti bekuasa atas semua.

Kami minta, datai mih Nuan ari serega ti manah amat,

ngambika kami dijaga dikemata, diibun dikerengkun belama.

Laban kami sehari tu bisi pengawa, bisi kerja.

(Diatu kitai sampi minta berkat ngeradu ka rumah serta bilik)

Kami besembiang minta berekat Nuan datai ba (setiap) bilik tu..........

di menua …endor… dirumah...TR _____…. ti nembiak Nuan.

Kami sigi nemu sereta ngelala Nuan Tuhan besai pangkat besai darjat ari semua,

enda kira di Serega tauka di dunya.

 

Sigi amat enda patut Nuan datai,

Nuan sangkai ba bilik, ba penaik kami orang ti bedosa,

laban kami suah ngelaban Nuan ketegal pengelemi ati,

pengarap puntan laban dosa.

Tang kami kempang nanya berani minta,

laban kami ingatka diri udah dibai bebaik enggau Nuan,

ditebus ulih Darah anak Domba,

ulih pemarai enggau pengangkat Anak Nuan,

Jesus Kristus Tuhan semua kami mensia.

Lalu ulih sakramen baptisa, kami dibai saum pengidup enggau Nuan

sereta diberi kuasa tau besembiang barang maya,

barang endor minta berekat minta tungkat, minta sukong,

minta tolong minta serayong ari Raja Serga.

 

Nya alai kami minta Nuan, Apai,

Merekat (semua) sida sebilik tu, ngambika sida sebilik begulai nyamai,

nadai laya, nadai utai ngawa,

tang diau dalam pengerindu Nuan, Allah Taala.

Ati sida asuh tuchi asuh beresi,

lepaska sida ari runding enggau ati ti mai enda nangika Nuan.

 

Bilik sida tu asuh beresi, asuh tuchi,

asuh rurus, asuh kudus,  

asuh chelap, asuh lindap,

asuh senang, asuh lantang,

asuh mansang, asuh nyegang,

enda senika, enda menawa.

Ngambika sida gayu guru, gerai nyamai,

diau begulai enggau Nuan, Apai; enggau sesama sida, serta enggau pangan diri.

Ngambika semua rayat …TR ___Endor ….nemu lalu ngelala,

Minta Nuan semampai diau ditu enggau sida belama.

 

(Diatu sampi merkat ka bilik, perabung rumah serta dinding enggau semua kerja)

Awakka pengasih Jesus Kristus nurun ngesai semua kuasa munsuh lalu magar ninding menuo tu, tanah tu, rumah tu, bilik tu ulih kuasa Darah anak Domba.

Awakka pengerindu Allah Apai mai berkat serta nungkat nuat, negi niri tiang perabung rumah serta mai penyelap lindap baka ambun nurun ari serga.

Lalu awak ka penyaup Roh Kudus mai penyerakup baka rapit batu dinding lalu nyempulang kita ti diau di rumah tu diatu sampai ka belama iya.

+Dalam Nama Apai Anak enggau Roh Kudus. Amen.

 

(Sampi tu kena merekat ka bala rayat serumah panjai)

Nya alai ka pengujong iya dalam sampi aku Fr. Makos saritu tu,

Dalam pendiau, pengawa, pengidup, ati, runding, ulah, jako enggau perangai kitai,

Aku bersampi minta Nuan Tuhan agi meda agi nengkila,

Agi merening agi ngiching,

Agi ngemujur agi ngator,

Agi merenong, selalu nyukong,

Agi ngerimbai agi nerabai, Awakka gayu, guru!

Awakka gerai nyamai!

Awakka Kaya Raja nguan menua!

Kami minta jalai bidik enggau lansik,

Minta betuah minta belimpah,

Minta gerai minta nyamai

Minta chelap minta embap.

Agi merekat agi nyelamat sida tu serumah… TR _____, ENDOR ….

serta kami semua ka ditu begelumu duduk betipan.

 

Enti ati kami tumpul dalam pengawa, asoh kami tajam,

Enti mata kami enda meda, buai empeleman,

Isi kami enggau pengerindu nuan dalam ati.

 

Anang ngasoh kami nugong ka penyumbong,

Baka menyaong tuchong gunung Lingga,

Bisi telaga tumpok tiga pendai Dara Dayang Kumang.

 

Nya alai ke tu bala menyadi,

Minta pengerai meh bala kitai ngagai Apai ke dikumbai Allah Taala,

Minta pengudus meh kitai dalam nama Jesus Kristus anak Kudus Dara Maria,

Awak ka kitai sama bela gerai nyamai,

Sama lantang senang bela mujur dalam kerja, Dalam sekula,

Awak ka semua kitai bansa Dayak ke baroh laa bulan mingkai,

Bulih pengerai, umur panjai senang lantang nguan menua.

 

Nya alai ke tu Tuhan,

Kami minta sagu ka Nuan ngagai batu tinggi da-dinggai,

Minta Nuan Nerima sampi pinta kami tu dalam nama Jesus Kristus Tuhan Kitai. AMEN.